Ушбу рукнимиздаги энг сўнгги янгиликлар билан таништиришда давом этамиз.
Холанд учун даъвогарлар ортмоқда
Дортмунднинг "Боруссия" клуби ҳужумчиси Эрлинг Холанд учун кураш авжига чиқмоқда.
"Don Balon" нашрининг маълум қилишича, норвегиялик футболчи учун курашга "Ювентус" ва "Манчестер Сити" клублари жиддий киришган.
Манбанинг маълум қилишича, "шаҳарликлар" ёш ҳужумчини қўлга киритиш мақсадида 100 миллион евро таклиф қилишга тайёр.
Aсамоа кетадими?
Миланнинг "Интер" клуби ярим ҳимоячиси Квадо Aсамоа фаолиятини "Сампдориа" клубида давом эттириши мумкин.
SDS нашри берган маълумотларга қараганда, Конте Aсамоани ўз режаларига киритмган. Шу боис, клуб футболчини имкон борича тезроқ сотиб юборишни истамоқда.
Манбанинг маълум қилишича, Aсамоа бошқа "Сампдориа"га ўтишга рози, бироқ бунинг учун йилига бир миллион евор маош талаб қилмоқда.
"Ливерпуль" сўнгги зарбани берадими?
Aнглиянинг амалдаги чемпиони - "Ливерпуль" трансфер ойнаси тўлиқ ёпилгунига қадар "Чемпионшип" вакили "Сток Сити"нинг асосий дарвозабони Жек Бетленд билан шартнома имзолаши мумкин.
"Mirror" нашрининг маълум қилишича, "қизиллар" 16 октябрга қадар футболчининг агенти билан музокаралар ўтказиш ҳуқуқидан унумли фойдаланмоқчи.
Эслатиб ўтамиз, жамоанинг асосий дарвозабони Aлиссон оғир жароҳат олгани боис, мавсумнинг катта қисмини ўтказиб юборади.
Уилшер рад этди
Aйни дамда эркин агент мақомидаги Жек Уилшер фаолиятини Шотландияда давом эттиришдан бош тортди.
"Calciomercato" нашри берган хабарларга қараганда, ярим ҳимоячи "Рейнжерс" билан шахсий шартнома борасида келиша олмаган.
Эслатиб ўтамиз, айни дамда Уилшер ўзи учун клуб излаш билан банд. Қаҳрамонимиз "Вест Ҳем" билан ўртадаги шартномани келишган ҳолда бекор қилганидан бери ўзи учун жамоа изламоқда.
"Милан"дан ўзгача юриш
Миланнинг "Милан" клуби трансфер ойнаси ёпилишидан аввалроқ "Страсбур" ҳимоячиси Муҳаммад Симакан билан шартнома имзоламоқчи эди.
"Tuttosport" нашрининг маълум қилишича, "Милан" ҳимоячи билан шахсий шартнома борасида келишган. Ҳатто, клуб билан унинг трансфери борасида ҳам келишувга эришга.
Манбанинг маълум қилишича, "россонерилар" керакли ҳужжатларни расмийлаштиришга улгурмай қолган. Шу боис, ушбу трансфер амалга ошмай қолди.
"Юве" Клюверни қўлдан чиқарган
Туриннинг "Ювентус" клуби Федерико Кьезадан аввалроқ Жастин Клюверт билан шартнома имзоламоқчи эди.
Италия нашрларининг маълум қилишича, 21 ёшли футболчи билан оғзаки келишувга эришилган бироқ, якунда "Фиорентина" футболчисини сотиб олишга қарор қилинган.
Бу воқеадан сўнг, Жастин "РБ Лейпциг" жамоасига ижара асосида йўл олишга қарор қилди.
