«Реал»нинг 19 ёшли бразилиялик ҳужумчиси Родриго ўзини ватандошлари — Неймар ва Робиньо билан таққослашларига муносабат билдирди.

"Фаолиятимнинг бошиданоқ, «Сантос»да ўйнаган кезларимда ҳам мени Неймар ва Робиньога қиёслашарди. Бу ҳар доим бўлган. Аммо ҳар доим Родриго бўлишни ва ўз ҳикоямни ёзишни исташимни айтганман. Робиньо ва Неймар «Сантос» ва ўзи ўйнаган бошқа клубларнинг афсонаси ҳисобланади. Неймар битта, мен эса фақат Родриго бўлишни хоҳлайман.

Менимча, юқори савияли бўлиш жуда муҳим, барчамиз биламизки, менинг позициямда ажойиб футболчилар бор. Бразилия терма жамоасида ўйнаш навбати келганида, яхши ҳаракат қиламан, машғулотларда ва ҳар бир ўйин олдидан Тите (Бразилия терма жамоаси бош мураббийи) талаб қилган нарсаларни бажараман. Терма жамоага чақирилишда давом этишим учун узлуксиз ўйнаб туришим лозим", - деди Родриго.

Эслатиб ўтамиз, Родриго 2019 йил ёзида «Сантос»дан «Реал»га ўтган. Мадрид клуби унинг трансфери учун 45 миллион евро сарфлаганди. Родриго ҳозиргача «қироллик клуби» таркибида 28 та ўйин ўтказиб, 7 та гол ва 4 та голли узатмага муаллифлик қилган.