Италия спорт вазири Винченцо Спадафора Туриннинг «Ювентус» клуби ҳужумчиси Криштиану Роналдунинг ҳатти-ҳаракатларини танқид остига олди. Коронавирусга чалинган футболчи протокол қоидаларини бузиб, Португалия терма жамоаси ихтиёрини тарк этиб, Туринга қайтиб келганди. Криштианунинг ўзи эса ёлғоннинг қурбони бўлганини айтганди.
«Баъзи футболчиларнинг машҳурлиги кибрга, ҳукуматга ҳурматсизлик қилишга ва омма олдида ёлғон гапиришга сабаб бўлмайди. Аксинча, сен маъсулиятли, ўзгаларга намуна ва бирор гап гапиришдан олдин ўйлашинг керак бўлади.
Мен бу масалага яна қайтмоқчи эмасман. Клубдаги хабарлардан маълумки, баъзи футболчилар Туриндаги меҳмонхонани тарк этишган. Мен энди бунга аралашишни хоҳламайман», - деди Спадафора ANSA журналистларига берган интервьюсида.