Туриннинг "Ювентус" клуби ҳужумчиси Пауло Дибала шартномани узайтириш борасида музокараларни давом эттираётганди. Бироқ, кеча музокара яна тўхтаб қолди.
Футболчининг агенти кеча клуб билан олиб борилган музокаралар ривожланмаганлиги сабабли, Турин шаҳрини тарк этди.
Томонлар Дибаланинг маоши борасида келиша олмаяпти. Айни пайтда «Ювентус»дан йилига 7,5 миллион евро маош олаётган Дибала янги шартномага кўра, йиллик маошини 15 миллион еврога ошириб беришларини талаб қилмоқда. Бу ҳақда Calciomercato.com сайти хабар бермоқда.
Агар "Юве" раҳбарияти Дибаланинг талабини қондирадиган бўлса, у ҳолда Дибала клубда кўп маош оладиган футболчилар орасида Криштиану Роналдудан кейин иккинчи ўринга чиқиб олади.
Айни пайтда «Ювентус» Дилабанинг йилига 10 миллион евро маош тўлашга тайёр.
Дибаланинг «Юве» билан амалдаги шартномаси 2022 йилнинг ёзида якунланади. Томонлар шартномани 2024 йилгача узайтиришмоқчи.
