Суперлиганинг 19-тур доирасида бўлиб ўтган "Қизилқум" ҳамда "Навбаҳор" жамоалари ўртасидаги учрашув якунига етгач, меҳмонлар бош мураббийи Нўъмон Ҳасанов матбуот анжуманида иштирок этди.
"Учрашув яхши майдонда, чиройли тарзда кечди. Гарчи асосий таркибнинг 5 нафар футболчиси майдонга тушмаган бўлса-да, йигитлар кўрсатмаларимни яхши бажариб, чиройли ўйин намойиш этишди. Биринчи бўлимда жамоамизда кўплаб хавфли вазиятлар юзага келган бўлса-да, йигитлар негадир гол ура олишмади. Ҳаттоки, бўш дарвозага ҳам тўп кирмади. Шундай бўлса-да, Наманганга ғалаба билан қайтяпмиз.
Ушбу ютуқни мухлислар, жамоамизни қўллаб-қувватлаб турган Наманган вилоят ҳокими Шавкат Шокиржанович Абдураззоқов, шунингдек, “Навбаҳор” ҳомийларига бағишлаймиз. Мазкур ғалаба улар учун байрам бўлди"-деди Ҳасанов.
