Киевнинг "Динамо" клуби бош мураббийи Мирча Луческу Чемпионлар лигаси гуруҳ босқичи 4-тури доирасида "Барселона"га қарши бўладиган ўйин олдидан ўз фикрларини билдириб ўтди.

"Биз ғалаба қозонишни истаймиз. Турли фалсафа ва ғояга эга бўлган клублар тўқнаш келади. Биз учун ғалаба жуда муҳим. Эртага "Барса"ни мағлуб этишни истаймиз. Аммо буни хоҳлаш бошқа, ғалаба қозониш — бошқа.

"Барселона" — бу "Барселона". Мессининг борлиги жамоага устунлик беради, аммо унинг йўқлиги клубга фойда бериши мумкин. Чунки, рақибимиз ҳимояда сифатлироқ ўйнайди.

2004 йилни яхши эслайман. Ўшанда Месси Чемпионлар лигаси дебют қилган бўлса, биз ғалаба қозонган эдик. "Шахтёр" учун ўша ғалаба муваффақият сари ташланган илк қадам бўлганди. "Динамо" Чемпионлар лигасининг гуруҳ босқичида ўйнамаётганига анча бўлганди. Мен бу ўйинга "Динамо"нинг ривожланиши учун туртки сифатида қараяпман", - деди Луческу.