Бразилиялик таниқли футболчи Роналдо арегнтиналик футбол афсонаси Диего Марадона билан муносабатлари қандай бўлгани ҳақида гапирди.

«Диего футболда бой мерос қолдирди. Унинг дунёни тарк этиб кетганини ҳазм қилиш қийин. Унинг вафоти ҳақидаги хабар мени ҳайрон қолдирди. Бундан чуқур қайғуга ботдим. У кўп инсонларнинг ҳаётини ўзгартирган эди. У мени футболга руҳлантиргани учун доимо миннатдорчилик билдираман.

Ёдимда бор, у Мадридга келганида кечки овқатни биргаликда тановвул қилгандик. Диего нимагадир 2та соат тақиб олган эди. У доимо 2та соат билан юриши ҳақида айтишганди. Мен ундан бунинг сабабини сўрадим. Марадона эса соатлар қизларидан совға бўлгани учун уларни ечмаслигини айтганди.

Учрашув сўнгида у соатларидан бирини ечди ва уни менга совға сифатида берди. Мен қабул қилишни истамагандим, аммо унинг жаҳли чиққани боис уни қабул қилишга мажбур бўлдим. Мен бу соатни умримнинг охирига қадар дўстлигимиз рамзи сифатида сақлаб қўяман», — деди Роналдо "The Mirror"га берган интервьюсида.