Braziliyalik taniqli futbolchi Ronaldo aregntinalik futbol afsonasi Diyego Maradona bilan munosabatlari qanday bo‘lgani haqida gapirdi.

«Diyego futbolda boy meros qoldirdi. Uning dunyoni tark etib ketganini hazm qilish qiyin. Uning vafoti haqidagi xabar meni hayron qoldirdi. Bundan chuqur qayg‘uga botdim. U ko‘p insonlarning hayotini o‘zgartirgan edi. U meni futbolga ruhlantirgani uchun doimo minnatdorchilik bildiraman.

Yodimda bor, u Madridga kelganida kechki ovqatni birgalikda tanovvul qilgandik. Diyego nimagadir 2ta soat taqib olgan edi. U doimo 2ta soat bilan yurishi haqida aytishgandi. Men undan buning sababini so‘radim. Maradona esa soatlar qizlaridan sovg‘a bo‘lgani uchun ularni yechmasligini aytgandi.

Uchrashuv so‘ngida u soatlaridan birini yechdi va uni menga sovg‘a sifatida berdi. Men qabul qilishni istamagandim, ammo uning jahli chiqqani bois uni qabul qilishga majbur bo‘ldim. Men bu soatni umrimning oxiriga qadar do‘stligimiz ramzi sifatida saqlab qo‘yaman», — dedi Ronaldo "The Mirror"ga bergan intervyusida.