«Барселона» бош мураббийи Роналд Куман Испания чемпионатининг 12-тури доирасида бўлиб ўтган «Кадис»га қарши ўйин (1:2) борасида ўз фикрини билдириб ўтди.

«Ушбу мағлубиятга изоҳ бериш қийин. Бунгача биз яхши ўйинлар ўтказиб келаётгандик. Биринчи бўлимда у қадар яхши ўйнай олмадик. Иккинчи таймда яхши ҳаракат қилдик, аммо хатолар туфайли мағлубиятга учрадик. Тушунарсиз.

Ён чизиқдан тўп ташлаб берилганидан кейин бундай гол ўтказиб юборишимиз керак эмас. Бу концентрацияни йўқотганимиз билан боғлиқ бўлса керак. Тўпсиз ўйинда бизга тажовузкорлик етишмаяпти. Шунинг учун гол ўтказиб юбораётган бўлишимиз мумкин. Иккинчи голни тушунарсиз тарзда ўтказдик.

Ушбу мағлубият туфайли соврин учун курашда анча ортда қолдик. Бу эса ҳафсалани пир қилди. "Атлетико" каби кучли жамоадан 12 очко ортда қолиш — бу ҳаддан ташқари кўп.

Олдинда учрашувлар кўп, аммо биз ишга бўлган муносабатимизни ўзгартирмасак, сафардаги беқарор ўйинларга барҳам бермасак, ҳеч нарсага эришмаймиз», — деди Куман.