"Ливерпуль" ҳужумчиси Муҳаммад Салоҳ Мисрнинг шимоли-ғарбий қисмида жойлашган Нагриг шаҳрига коронавирус билан курашишда ёрдам берди. Mirror нашрининг хабар беришича, 28 ёшли футболчи маҳаллий шифохона учун кислород баллонлари сотиб олган.
Манбага кўра, Салоҳ ҳукумат шифохоналарида баллон танқислиги сабабли Нагригда кўплаб ўлимлар ҳақида хабар топган. Шундан сўнг, Муҳаммад 2017 йилда ташкил этилган Нагриг хайрия жамғармаси орқали хайрия қилди.
“Салоҳ ва унинг оиласи Нагригдаги коронавирус билан оғриган беморларга ёрдам бериш учун касалхонага кислородли баллонлар сотиб олиб берди. У тез-тез хайр-эҳсонлар орқали Миср муаммоларини ҳал қилишга ёрдам беради”, – деди жамғарма директори Ҳасан Бакр.
Салоҳ кўп йиллар давомида Нагриг ва унинг одамларига ёрдам бериб келади. Хусусан, Муҳаммад шаҳар тез тиббий ёрдам станцияси, маҳаллий мактаб, спорт клублари қурилишини ва даволаш иншоотларини сотиб олишни молиялаштирди. 2020 йил апрель ойида Салоҳ пандемия туфайли қийин вазиятга тушиб қолганлар учун бир неча минг тонна озиқ-овқат сотиб олди.
