Англия Кубогининг 3-босқичида «Тоттенхэм» сафарда камтаргина ҳисобланган «Марин» жамоаси меҳмони бўлди. Учрашув Жозе Моуриньо шогирдларининг 5:0 ҳисобидаги ишончли ғалабаси билан якунланди.
«Шпорлар» матбуот хизмати клубнинг «Твиттер»даги расмий саҳифаси орқали португалиялик мутахассис жамоани оддий стулда ўтириб бошқараётгани акс этган фотосуратни жойлади.
Коронавирус чекловлари туфайли мухлислар ушбу ўйинни стадиондан бевосита кузата олишмади, шунинг учун, икки нафар мухлис ўйинни тўсиқлар ортидан кузатишга мажбур бўлди.
Қўшимча ўрнида шуни айтиш керакки, «Марин» Шимолий Премьер-лиганинг Ғарбий биринчи дивизионида иштирок этади, бу Англиянинг саккизинчи дивизиони саналади.
