Фарғонанинг “Нефтчи” ва Ўзбекистон миллий терма жамоаси ҳимоячиси Ислом Тўхтахўжаев “Локомотив”га ўтиши ҳали 100 фоиз ҳал бўлмаган, аммо футболчи охир-оқибат Тошкент клуби билан шартнома имзолаши аниқ.
“Локомотив” клуби расмийлари берган маъумотга кўра, Ислом Тўхтахўжаев “Локомотив” футболчисига айланиб бўлган, аммо футболчининг ўзи “Стадион” газетаси сайти учун берган интервьюсида “ҳозирча ҳеч қайси жамоа билан шартнома имзоламаганини” айтиб ўтган.
Терма жамоа бош мураббийи Вадим Абрамов Тўхтахўжаевнинг “Локомотив”га ўтишини шарҳларкан, миллий терма жамоа манфаатларидан келиб чиқиб футболчи тўғри қарор қабул қилганини айтиб ўтди.
“Тўхтахўжаев ушбу қарорни қабул қилишдан аввал мен билан маслаҳатлашдими? Мен бир гапни айтаман: футболчининг қайси клуб билан шартнома имзолаши бу унинг шахсий иши”, деди Абрамов.
“Ҳа, Тўхтахўжаевга Осиё клубларидан таклифлар борлиги ҳақида эшитгандим. Аммо миллий терма жамоа манфаатларидан келиб чиқиб айтадиган бўлсак, Ислом тўғри қарор қабул қилди”, деди Ўзбекистон миллий терма жамоаси Вадим Абрамов “Стадион” газетаси сайтига берган интервьюсида.
