Англия премер лигасининг 23-туридан ўрин олган баҳсда, «Ливерпуль» ўз майдонида «Манчестер Сити»га йирик, 1:4 ҳисобида мағлубиятга учради.

Ушбу ўйин «қизиллар»нинг чемпионат доирасида ўз уйидаги кетма-кет учинчи мағлубият бўлди. Мерсисайд клуби бундай кўрсатгични 1963 йилдан бери яна қайд этди. Яъни жамоа 58 йилдан буён «Энфилд»да қаторасига 3 ўйинда мағлуб бўлмаган эди.

Аввалроқ, Юрген Клопп шогирдлари уйда «Брайтон» (0:1) ва «Бёрнли» (0:1) билан ўйинда имкониятни бой берган эди. Умуман олганда, «Ливерпуль» ўз майдонида кетма-кет ўтган 5 учрашувда ғалаба қозона олмади. 3 мағлубият ва 2 дуранг.