Барчамизга маълумки, Ўзбекистон Республикаси Президентининг “Ўзбекистонда футболни ривожлантиришни мутлақо янги босқичга олиб чиқиш чора-тадбирлари тўғрисида”ги фармонида футбол соҳасида бевосита фаолият олиб борадиган шахслар томонидан тотализатор ўйнаш, ўйинга ёки унинг натижасига таъсир ўтказиш мақсадида келишилган ўйинлар уюштириш, уларда иштирок этиш жиноий ва маъмурий жавобгарликка тортилиши масаласига алоҳида урғу берилган.

Шу боисдан юртимизда 2021 йилги футбол мавсуми старти олдидан ЎФАнинг масъул ходимлари томонидан Ўзбекистон Суперлига ҳамда Про-лигада иштирок этувчи ҳар бир футбол клуби аъзолари учун келишилган ўйинларга қарши кураш мавзусида давра суҳбатлари ташкил этилиб, бу борада тушунтириш ишлари олиб борилмоқда.

ЎФАнинг масъул ходимлари "Сурхон", "Пахтакор", "Металлург", "Локомотив", "Қўқон-1912", "Нефтчи", "Бунёдкор" клублари вакиллари билан ўтказилган давра суҳбатлари давомида 2020 йилда келишилган ўйинларга қарши кураш бўйича амалга оширилган ишлар сарҳисоби тақдим этилиб, 2021 йилда бу борада янада жиддий иш олиб борилиши маълум қилинмоқда.

Ўтган йилдан эътиборан келишилган ўйинлар ташкил қилиш, бу каби ўйинларда иштирок этиш нафақат ЎФА томонидан, балки ҳуқуқни муҳофаза қилувчи органлар томонидан ҳам назорат ва таҳлил этиб келинди ҳамда айбдорларга тегишли чоралар кўрилди.

Шу сабабли клублар ходимлари, футболчи ва мураббийлари учун давра суҳбатлари ташкил этилиб, тотализатор ўйнаш, учрашув натижасига таъсир ўтказиш учун келишилган ўйинлар ташкил қилиш, уларда иштирок этиш ҳолатларини бартараф қилиш, шу каби ўйинларда қатнашишга ундаш ҳолатлари учраганда эса биринчи навбатда тегишли органлар ҳамда ЎФАни хабардор қилиш лозим экани борасида тушунтириш олиб борилди. Ишчи гуруҳ Республика бўйлаб бу каби учрашувларни давом эттиради.

Келишилган ўйинларга қарши кураш бўйича бу каби амалий ишлар узлуксиз тарзда олиб борилади.