Айни вақтда Лондоннинг "Арсенал"да шуғулланаётган Робер Пирес инглиз нашрларига берган интервьюсида Тьерри Анрига ўхшаб канонирлар билан шартнома имзоламаслигини айтиб ўтди.
Эслатиб ўтамиз, 1999 йилдан 2007 йилга қадар "Арсенал" шарафини ҳимоя қилган Тьерри Анри 3 январь куни "Арсенал" билан икки ойлик шартнома имзолади. Ҳуқуқий жиҳатдан АҚШнинг "Нью-Йорк Ред Буллз" клубига тегишли бўлган футболчи 8 январь куни "Лидс"га қарши Кубок учрашувида майдонга тушиб, "Арсенал"га ғалаба келтирган ягона гол муаллифига айланди.
"Менда "Арсенал" билан шартнома имзолаш нияти йўқ, бош мураббийга ҳам керак бўлмасам керак. Венгерда ярим ҳимоячилар етарли. Шунчаки, Англияда ўз жамоаларининг собиқ футболчиларига жуда ҳурмат билан муносабатда бўлишади", деди Франция терма жамоасининг собиқ футболчиси.
"Мен Осиёдан таклифларни кутмоқдаман. Айни вақтда Хитойдан бўладиган таклифлар ҳар тарафлама қулайроқ кўринмоқда. Мен Хитойнинг бир клуби билан музокара олиб боряпман. Бундан ташқари, Ҳиндистондан ҳам бир таклиф бор", дея қўшимча қилди "Арсенал" таркибида 189 учрашувда майдонга тушиб, 62 та гол урган футболчи.
