"Ювентус" вице-президенти Павел Недвед Турин клуби раҳбарияти ҳужумчи Криштиану Роналду ва бош мураббий Андреа Пирло билан хайрлашмоқчи эмаслигини маълум қилди.
«Криштиану Роналду "Ювентус"да қолади, у дахлсиз. Андреа Пирло эса кейинги мавсумда ҳам жамоанинг мураббийи бўлади», - деди Недвед DAZN телеканали эфирида.
Эслатиб ўтамиз, ОАВда португалиялик ҳужумчининг кетиши мумкинлиги тўғрисида доимий равишда хабарлар пайдо бўлаётир. Катта эҳтимол билан унинг "Реал"га қайтиши айтилмоқда.
Шунингдек, сўнгги ўйинларнинг натижалари бош муарббий Пирлонинг ҳам ўз лавозимида қолиш имкониятини шубҳа остига қўйди.
Маълумот учун, "Ювентус" Италия чемпионати якунланишига 11 тур қолганида биринчи ўриндаги "Интер"дан 10 очко ортда қолмоқда.
