«Ювентус» ҳужумчиси Криштиану Роналду жамоасининг навбатдаги ўйинида иштирок эта олмайди. Бу ҳақда туринликлар бош мураббийи Андреа Пирло хабар берди.

«Таркибимизда муҳим ўйинчимиз бўлмайди. Роналду мушагидан олган жароҳати туфайли «Аталанта»га қарши баҳсни ўтказиб юборади. Бергамодаги баҳсда уни майдонга тушириш ҳаддан ташқари таваккалчилик бўлган бўларди.

Умид қиламан, Криштиану чоршанба куни ўтказиладиган ўйинга тайёр бўлади. «Женоа»га қарши учрашувдан кейин муаммо пайдо бўлганди. Ушбу ҳафтада у тўла куч билан ишлай олмади. Чунки, биз таваккал қилмасликка қарор қилдик. Асосий таркибда Дибала ўйнайди», – деди «Ювентус» бош мураббийи Андреа Пирло.

«Аталанта» ва «Ювентус» жамоалари ўртасидаги ўйин 18 апрель, якшанба куни Тошкент вақти билан 18:00да бошланади.