Бугун МОҚ раисининг биринчи ўринбосари Равшан Эрматов Қўмитанинг ҳудудий вакиллари билан онлайн йиғилиш ўтказди.
Унда «Спортни сев, спорт билан яша!» Республика оммавий мусобақасининг ташкилий жараёнлари, Токио-2020 Олимпия ва Паралимпия ўйинларига тайёргарлик кўраётган спортчиларимизнинг ижтимоий вазиятини ўрганиш масалалари муҳокама қилинди. Йиғилиш ЗООМ платформаси орқали ташкил этилди.
Йиғилиш давомида Равшан Эрматов даставвал барча ҳудудлар кесимида «Спортни сев, спорт билан яша!» мусобақасининг апрель ойида амалга оширилган ишлар бўйича ҳисоботларни тинглади. Унда кўрсаткичи паст бўлган вилоят мутасаддиларига огоҳлантириш эълон қилиниб, йўл қўйилган камчиликларни бартараф этиш борасида кўрсатмалар берилди. Кун тартибига мувофиқ, ушбу мавзу муҳокамасидан сўнг вилоятларда Токио-2020 Олимпия ва Паралимпия ўйинларига тайёргарлик кўраётган спортчиларнинг ижтимоий ҳолати, оилаларидан қанчалик хабар олиб турилаётгани бўйича маълумотлар ўрганилди.
“Олимпиада жуда яқин. Спорт тилида айтганда финиш тўғри чизиғидамиз. Спортчиларимиз машғулоти давомида уйида қандайдир муаммоси борлигини ўйламаслиги лозим. Биз атлетларимизнинг ёрдамчисимиз. Ҳар бир спортчиларимизнинг оиласига бориб, уларнинг шароитларини ўрганишимиз Президентимиз жорий этган маҳаллабай тизимига тўғри келади. Қолаверса, «Спортни сев, спорт билан яша!» мусобақаси орқали юртимиз аҳолисининг спорт билан шуғулланиш кўрсаткичини янада оширишимиз лозим”, – деди Равшан Эрматов.
