Bugun MOQ raisining birinchi o‘rinbosari Ravshan Ermatov Qo‘mitaning hududiy vakillari bilan onlayn yig‘ilish o‘tkazdi.

Unda «Sportni sev, sport bilan yasha!» Respublika ommaviy musobaqasining tashkiliy jarayonlari, Tokio-2020 Olimpiya va Paralimpiya o‘yinlariga tayyorgarlik ko‘rayotgan sportchilarimizning ijtimoiy vaziyatini o‘rganish masalalari muhokama qilindi. Yig‘ilish ZOOM platformasi orqali tashkil etildi.

Yig‘ilish davomida Ravshan Ermatov dastavval barcha hududlar kesimida «Sportni sev, sport bilan yasha!» musobaqasining aprel oyida amalga oshirilgan ishlar bo‘yicha hisobotlarni tingladi. Unda ko‘rsatkichi past bo‘lgan viloyat mutasaddilariga ogohlantirish e’lon qilinib, yo‘l qo‘yilgan kamchiliklarni bartaraf etish borasida ko‘rsatmalar berildi. Kun tartibiga muvofiq, ushbu mavzu muhokamasidan so‘ng viloyatlarda Tokio-2020 Olimpiya va Paralimpiya o‘yinlariga tayyorgarlik ko‘rayotgan sportchilarning ijtimoiy holati, oilalaridan qanchalik xabar olib turilayotgani bo‘yicha ma’lumotlar o‘rganildi.

“Olimpiada juda yaqin. Sport tilida aytganda finish to‘g‘ri chizig‘idamiz. Sportchilarimiz mashg‘uloti davomida uyida qandaydir muammosi borligini o‘ylamasligi lozim. Biz atletlarimizning yordamchisimiz. Har bir sportchilarimizning oilasiga borib, ularning sharoitlarini o‘rganishimiz Prezidentimiz joriy etgan mahallabay tizimiga to‘g‘ri keladi. Qolaversa, «Sportni sev, sport bilan yasha!» musobaqasi orqali yurtimiz aholisining sport bilan shug‘ullanish ko‘rsatkichini yanada oshirishimiz lozim”, – dedi Ravshan Ermatov.