«Ювентус» клуби «Милан» дарвозабони Жанлуижи Доннаруммага туринликлар сафига қўшилса, йилига 10 миллион евродан кўпроқ маош тўлашга тайёр, деб хабар бермоқда Corriere dello Sport.

Футболчининг агенти Райола ва унинг ўзи ҳанузгача “Милан” билан янги шартнома борасида келиша олмаяпти. Клуб футболчига йилига 8 миллион евродан ортиқ маош беришга тайёр эмас, футболчи томони эса 12 миллион евро талаб қилмоқда. Агарда томонлар келишувгаэриша олмаса, «Ювентус» Жанлуижини сотиб олишга ҳаракат қилади.

Маълумот учун, Доннарумма «Милан» да 2015 йилдан бери ўйнаб келмоқда. Жорий мавсумда дарвозабон Италия А Сериясида 31та ўйинда майдонга тушиб, 35та гол ўтказиб юборди. “Милан” эса турнир жадвалида иккинчи ўринда бормоқда. Transfermarkt интернет-портали футболчининг трансфер нархини 60 миллион еврога баҳоламоқда.