Хакими «Бавария» га ўтишга тайёр. Фақат...
«Интер» ҳимоячиси Ашраф Ҳакими «Бавария» футболчисига айланиши мумкин.
Sport1.de хабарига кўра, футболчи ушбу ёзда Мюнхен клубига ўтишга қарши эмас.
«Бавария» ҳали «Интер»га 22 ёшли футболчининг трансфери бўйича таклиф билан чиқмаган. Хакимининг Италия клуби билан шартномасида товон пули йўқ, амалдаги келишув эса 2025 йилда тугайди.
«Бавария» Ҳакими билан шартнома имзолаш имкониятини олиш учун 45 миллион евродан кўпроқ таклиф қилиши керак бўлади. Немис клуби ҳимоянинг ўнг қанотини мустаҳкамламоқчи ва шу билан бирга Буну Саррни сотмоқчи.
Ўз навбатида «Бавария» ушбу позицияга янги футболчи сотиб олмоқчи, чунки ҳозирда клубда Мюнхеннинг янги бош мураббийи Юлиан Нагельсманн талабларига жавоб берадиган футболчи йўқ.
Вазиятга, шунингдек, «Интер» коронавирус пандемияси шароитида дуч келадиган молиявий муаммолар ҳам таъсир қилиши мумкин. Италияликларнинг қарзи 630 миллион еврога баҳоланмоқда, клуб эса вазиятни тўғирлаш учун энг яхши футболчиларини сотиши керак бўлиши мумкин.
Маълумот учун, Ҳакими ушбу мавсумда «Интер» билан 41 ўйин ўтказиб, 7 гол урди ва 8 голли узатма амалга оширди.