The Telegraph нашрининг хабар беришича, айни пайтда УЕФА Буюк Британия бош вазири Борис Жонсоннинг Чемпионлар Лигаси финалини Лондондаги «Уэмбли» стадионига кўчириш таклифини кўриб чиқмоқда. Инсайдерлар бунинг имкониятини 50:50 деб баҳолашмоқда.
Маълумки, ЕЧЛ финали 29 май куни Истанбулда ўтказилиши лозим. Ҳал қилувчи баҳсда Англиянинг «Манчестер Сити» ва «Челси» клублари тўқнаш келишади. Бироқ Туркияда коронавирус билан боғлик эпидемиологик вазият «қизил худуд»га киритилган. Британия хукумати ушбу мамлакат билан авиақатновларни тўхтатган.
Муҳим турнирнинг ҳал қилувчи учрашувини бирданига бошқа мамлакатга кўчириш Туркия футбол федерациясининг кескин эътирозларига сабаб бўлиши мумкин. Бунинг устига халқаро ТВ компаниялар билан ҳам муаммолар юзага келиши эхтимолдан холи эмас.
УЕФА уч кун ичида бир қарорга келишини маълум қилган.
