Бугун Тошкентнинг "Пахтакор" клуби иккита синов-назорат ўйинида майдонга тушади.
"Чилонзор" стадиони яқинида қурилган сунъий қопламали майдон ҳар икки беллашувга мезбонлик қилади. Соат 13:30 да яқиндагина клуб ёшларига қарши майдонга чиққан "Қизилқум" Деян Журжевич шогирдларига қаршилик қилади. Айни пайтда Зарафшон жамоасини Равшан Ҳайдаров ва Алексей Евстафеев каби мураббийлар бошқараётганини инобатга олсак, ҳар икки томон ўзаро келишиб олганини тушуниш мумкин.
Соат 15:00 да эса "пахтакорчилар" Муборакнинг "Машъал" клубига қарши саф тортишади. Ҳар икки ўйин давомида Журжевич қўл остидаги футболчиларни Туркиядаги халқаро турнир олдидан синовдан ўтказиб олади.
Маълумот ўрнида айтиш керакки, ҳар иккала ўйинда ҳам таймлар 45 эмас, балки 30 дақиқани ташкил қилади.
