«Лилль» жамоаси сафида Франция чемпионига айланган Майк Меньян тез орада А Серияда фаолият бошлаши кутилмоқда.
Sky Sports Italia’нинг хабар беришича, 25 ёшли франциялик посбон янги мавсум олдидан «Милан» футболчисига айланади. Италия клуби Меньян трансфери учун «Лилль» клубига 15 миллион евро тўлаши кутилмоқда. Майк бугун Миланга келиб, тиббий кўрикдан ўтиши режалаштирилган.
Аввалроқ, Жанлуиджи Доннарумманинг «россонерлар»ни эркин агент сифатида тарк этиши хабар берилганди.
Маълумот учун, Меньян Лига 1 жорий мавсумида 21 ўйинда ўз дарвозаси дахлсизлигини сақлаб қолган.
