Миср Премьер-лигасининг 17-туридан ўрин олган «Ал-Масрий»-«Ал-Аҳлий» ўйинидадан сўнг ҳар иккала жамоа мухлислари ўртасида келиб чиққан оммавий муштлашувда 73 киши ўлган.

Порт-Саид шаҳрида жойлашган шу номли стадионда Тошкент вақти билан 20:00 да бошланган учрашувда маҳаллий «Ал-Масрий» 3:1 ҳисобида ғалаба қозонган. Учрашувнинг биринчи бўлимида «Ал-Аҳлий» футболчиси, бразилиялик ҳужумчи Фабио Жуниор томонидан 11-дақиқада киритилган голдан сўнг меҳмонлар олдинда боришаётган эди. Бироқ 72-, 82-, 92-дақиқаларда мезбонлар 3 та жавоб тўпи киритишган.

Стадион хавфсизлик хизмати вакилининг тасвирлашича, ўйиндан сўнг «Ал-Масрий» мухлислари майдонга тушиб келишган ва қоҳиралик мухлислар томон тош, шиша ва петардалар улоқтира бошлашган. Футболчиларнинг баъзиларига ҳам тан жароҳати етказилган, бироқ уларни кийиниш хонасига яширишган.

Associated Press хабарига кўра, Порт Саид шаҳри морги ходими ўлдирилганлар орасида стадион хавфсизлик хизмати ходимлари ҳам борлигини айтиб ўтган. Миср соғлиқни сақлаш вазирлиги 40 нафар қурбон ҳақида расман хабар тарқатган эса-да, ўлдирилганлар сони 70 дан ошганлиги хабар қилинмоқда.

ВВCнинг хабар беришича, кўплаб фанатлар пичоқ билан қуролланган, баъзилари эса стадионга ўт қўйишга ҳаракат қилишган.

«Миср Эл-Классикоси»нинг иккинчи иштирокчиси — «Замалек» 17-тур доирасида Қоҳирада «Исмоилия» клубини қабул қилаётган эди. Учрашувда ҳисоб 2:2 лигида ўйин тўхтатилган. Чунки бу стадионда ҳам тартибсизлик юзага келган — мухлислар стадионга ўт қўйишган.

Миср футбол федерацияси Премьер-лига ўйинларини ўтказишни номаълум вақтгача тўхтатиб туришини маълум қилган.