Югураман деб 2-3 қадам ташладию... бирдан ерга йиқилди. Ёнидаги жамоадошлари ва рақиб футболчилари тезда вазият жиддийлигини пайқашиб врачларни имо-ишоралар билан чақиришди.

Унинг кўзлари очиқ ва бир нуқтада қотиб қолганди. Юрагим шууув этди, мияга қон қўйилди (инсульт) деган фикр келди. Вақт тўхтаб қолгандай, жамоа шифокори эса хаёлимда жуда кеч югуриб келгандай бўлди.

Уни ўраб олишди, жамоа сардори ёрдам бериб бошини ушлаб турди ва гўё уни оғзига бармоқларини солиб тилини тортмоқчи бўлгандай таассурот қолдирди. Вақт тўхтаб қолганди, ҳамма шокда.

Унга сунъий нафас қила бошлашди, уни ўраб турган жамоадошларини айримларини кўзларида ёш, айримлари дуо қилишарди...

Уни дефибриллятор ёрдамида жонлантиришмоқчи бўлганини кўриб, вазият қил устида эканлигини тушундим. "Керак эмас Евро, керак эмас турнир, фақат шу йигит ўлмасин" деган фикр миядан тўхтамасдан зуувв этиб ўтарди...

15 дақиқа, балки сал кўпроқ уни ҳаётга қайтариш учун майдонни у йиқилган жойида кураш кетди, лекин... вақт эса тўхтаб қолгандай эди, гўё...

Хайрият, уни ўзига келган суратни кўрганимдан кейин (уни тўлиқ ўраб олишганди ва нима бўлаётганини кўришни имкони деярли йўқ эди), қаттиқ чанқаганимни сездим.

Ҳаёт, футболдан устун!

Инсонийлик, одамгарчилик — миллат, эллат, ижтимоий масофа ва дин танламаслигига яна бир бора гувоҳ бўлдим! Тезроқ соғайиб кет, Кристиан!

p.s. Воқеа рўй берган ҳолатдан кейин, арзимаган 90 минут ичида Германия терма жамоаси мана бундай расмни пост қилди!

Яшасин инсонийлик, абадий бўлсин одамгарчилик, браво шу ишни бутун жамоа билан ташкил қилган немисларни ақли ва иши тез менежерлари!

Дания эса бугун ғалаба қозонди!

Фурқат Қурбонов.