"Эвертон"га Рафаэль Бенитес янги бош мураббий сифатида келишига яқин турибди. Ёзнинг бошида Карло Анчелотти кетганидан бери ушбу лавозим бўш қолмоқда.
Бироқ Бенитеснинг эҳтимолий тайинланиши "Эвертон" мухлисларини ғазаблантирди. Илгари ўз клубининг асосий рақиби бўлган "Ливерпуль"ни муваффақиятли бошқарган 61 ёшли мураббийга мухлислар қарши чиқишмоқда. Бир кун олдин "Гудсон Парк" стадионида иккита баннер пайдо бўлди, улардан биттасида "Бенитесни қабул қилишмайди" деб ёзилган, иккинчисида эса испанияликни ҳақорат қилишган.
Бенитеснинг сўнгги иш жойи Хитойнинг «Далянь Про» клуби эди, у жамоани 2021 йил январ ойида коронавирус пандемияси туфайли тарк этган.
Ўтган мавсумда "Эвертон" АПЛ турнир жадвалида 10-ўринни эгаллади.
