Тошкентнинг “Бунёдкор” клуби Туркиянинг Анталия шаҳрида йиғин ўтказаётганидан хабарингиз бор. Жамоанинг тажрибали ҳимоячи Хайрулла Каримов клуб матбуот хизматига мавсумолди тайёргарликлар борасида ўз фикрларини билдириб ўтди.

«2012 йилги мавсумга тайёргарликни Тошкентда бошладик. Йиғиннинг илк босқичида секин-аста қайта тикланиш машқларини бажаргандик. Кейинги тайёргарлигимиз Дубайга кўчди ва у ерда “Зенит”, “Шахтёр”, “Вольфсбург” ва “Ксамакс” каби кучли жамоаларга қарши ўйнашга ҳаракат қилдик».

«Ўйлайманки, ушбу йиғин биз учун фойдали бўлди. Ташкил этилган мусобақадаги асосий вазифамиз натижа эмасди, аксинча таркибни шакллантиришга кўпроқ эътибор қаратилди. Ишонч билан айта оламанки, футболчилар Дубайда ўтган йиғинда яхши тайёрланишди ва бундан мураббийлар штабининг кўнгли тўлди».

«Ҳозирги кунда Анталияда машғулотлар олиб боряпмиз. Бу ердаги об-ҳаво ҳарорати Дубайдагидек иссиқ бўлмаса-да, ҳақиқий футбол ҳавоси ҳукмронлик қилмоқда. Анталия йиғини доирасида жисмоний тайёргарликка ҳам катта эътибор қаратилмоқда. Шунингдек, режамиздаги тўртта ўртоқлик учрашувини яхши ўтказиб, жамоавий ўйинимизни янада яхшироқ шакллантиришимиз керак».

«Якунловчи йиғинимиз яна Дубайда олиб борилади. Унда мавсумнинг илк учрашувларига жиддий тайёргарлик кўрилади. Очиғини айтганда, жамоадошларим билан янги мавсумни жуда-жуда соғиндик. “Бунёдкор” ўз олдига ҳар сафаргидек юксак марраларни вазифа этиб қўйган. Бунга эришиш учун бор кучимизни сарфлаб, мухлисларимизни хурсанд қиламиз, деган умиддаман», - дейди Хайрулла Каримов "Бунёдкор" матбуот хизматига берган интервьюси чоғида.