Ўзбекистон Профессионал футбол лигаси бош директори вазифасини бажарувчи Диёр Имомхўжаев клубларимиздаги асосий камчиликлардан бири ҳақида тўхталиб ўтди.
"Футбол клублари ОФК лицензиясини олиш учун AFCCLAS платформасига талаб этилган ҳужжатларни жойлайди. Улар орасида клубнинг ёшлар билан ишлаш тизимини ривожлантириш дастури ҳам бўлиши лозим.
Йиллар давомида клубларимиз бунга беписанд муносабатда бўлган ҳамда платформага керагидан кўп саёз ёзилган ёки Европа клублариникидан уятсизларча ўғирланган дастурларни инглиз тилида жойлаб келган. Аслида бу дастур ўзбек тилида ҳатто мавжуд бўлмаган, жуда кўп клубларимиз бу дастур асосида ишламаган. Бу худдики талабаларимиз курс ишини интернетдан кўчириб ёзиб, университет дипломини шу зайлда ҳал қилиб келганига ўхшайди.
Биз эса ўтган йили айнан шу йўналишни ривожлантириш учун ЎзПФЛда алоҳида Клубларни ривожлантириш бўлимини ташкил қилганмиз. Ҳозирча қатор клубларимизнинг эски услубдаги қилиқларини аниқлаб келмоқдамиз, энди вақти-вақти билан шармандали ҳолатларга йўл қўяётган клубларни очиқлаймиз. Афсуски, бизнинг айрим клубларда олий маълумоти йўқ раҳбарлар-у, техник директорнинг вазифаси нима эканини ҳам билмайдиган даражадаги кишилар фаолият олиб боради", - деди Имомхўжаев ўз телеграм саҳифасида.
