O‘zbekiston Professional futbol ligasi bosh direktori vazifasini bajaruvchi Diyor Imomxo‘jayev klublarimizdagi asosiy kamchiliklardan biri haqida to‘xtalib o‘tdi.

"Futbol klublari OFK lisenziyasini olish uchun AFCCLAS platformasiga talab etilgan hujjatlarni joylaydi. Ular orasida klubning yoshlar bilan ishlash tizimini rivojlantirish dasturi ham bo‘lishi lozim.

Yillar davomida klublarimiz bunga bepisand munosabatda bo‘lgan hamda platformaga keragidan ko‘p sayoz yozilgan yoki Yevropa klublarinikidan uyatsizlarcha o‘g‘irlangan dasturlarni ingliz tilida joylab kelgan. Aslida bu dastur o‘zbek tilida hatto mavjud bo‘lmagan, juda ko‘p klublarimiz bu dastur asosida ishlamagan. Bu xuddiki talabalarimiz kurs ishini internetdan ko‘chirib yozib, universitet diplomini shu zaylda hal qilib kelganiga o‘xshaydi.

Biz esa o‘tgan yili aynan shu yo‘nalishni rivojlantirish uchun O‘zPFLda alohida Klublarni rivojlantirish bo‘limini tashkil qilganmiz. Hozircha qator klublarimizning eski uslubdagi qiliqlarini aniqlab kelmoqdamiz, endi vaqti-vaqti bilan sharmandali holatlarga yo‘l qo‘yayotgan klublarni ochiqlaymiz. Afsuski, bizning ayrim klublarda oliy ma’lumoti yo‘q rahbarlar-u, texnik direktorning vazifasi nima ekanini ham bilmaydigan darajadagi kishilar faoliyat olib boradi", - dedi Imomxo‘jayev o‘z telegram sahifasida.