Бугун «Спорт» телеканалининг «Футбол шарҳи» дастурининг жонли эфирида чиқиш қилган Вадим Абрамов олимпия терма жамоасининг олдида турган вазифалар ва режалар ҳақида айтиб ўтди.

Олимпиячиларимиз 11 февраль куни Дубайда Филиппин олипиячиларига қарши ўртоқлик учрашувида майдонга тушишади. Шунингдек, музокаралар муваффақиятли якунланса, 21 февралда Доҳадаги «Ал-Аҳлий» стадионида Ироқ терма жамоасига қарши ўтадиган 5-тур учрашувигача Баҳрайн олимпиячиларига қарши ўртоқлик учрашуви ўтказилиши мумкин. Таклиф баҳрайнликларга жўнатилган, фақат уларнинг розилигини кутиш қолган, холос.

Шунингдек, бош мураббийимизнинг гапларига кўра, 24 февраль куни Дубайда Лондон олимпиада йўлланмасини нақд қилган «қора қитъа» вакили – Миср олимпиячиларига қарши ўртоқлик учрашуви ҳам ўтказилади.

Шундан сўнг олимпиячиларимиздан 4-5 нафари Дубайдан Сеулга учишади. 25 февраль куни Сеулда улар миллий терма жамоамиз сафида Жанубий Корея миллий терма жамоасига қарши ўйинда майдонга тушиши мумкин. Модомики бундай бўлмаган тақдирда ҳам, 29 февраль куни Япониянинг Тойота шаҳрида ЖЧ-2014 IV саралаш босқичи доирасидаги сўнгги – 6-тур учрашувида Японига миллий терма жамоасига қарши ўтадиган ўйинда майдонга чиқишлари мумкин. Бу гаплари билан Вадим Карленович Жанубий Корея ва Япония миллий терма жамоаларига қарши бутунлай олимпия терма жамоамиз ўйнаши ҳақидаги миш-мишларга нуқта қўйди.