«Бунёдкор» аъзолари Анталияда олиб борилаётган машғулотларда мириқиб шуғулланишяпти.
6 январь куни кечки маҳалги машғулотларда асосан стандарт вазиятларига эътибор қаратилди. Виктор Карпенко, Шавкат Саломов, Анвар Ражабов, Илҳом Бойдедаев, Алибобо Раҳматуллаев каби футболчилар бурчак зарбаларини бажаришди. Қолганлар эса жарима майдончаси ичида тартибли жойлашишни, яъни ҳужумчилар гол уришга, ҳимоячилар эса хавфни бартараф этиш бўйича машқ қилишди. Шунингдек, жарима майдончаси яқинида кучли зарбага эга бўлган бошқа футболчилар ҳимоячилардан қайтган тўпларни дарвозага йўллашга шай туришди.
Машғулот давомида жарима майдончаси яқинидаги нуқталардан, қанотлардан бажариладиган стандартлар бўйича ҳам алоҳида ишланди. Шунингдек, қанотлардан ҳужумлар ташкил этиш борасида тактик машқлар ўтказилди.
Шуниси қувонарлики, Миржалол Қосимов машғулотларида иштирок этаётган футболчилар сидқидилдан шуғулланишиб, вақт қандай ўтаётганини сезмай ҳам қолишяпти. Эътиборлиси, машғулот якунлангандан кейин ҳам ҳеч ким майдонни тарк этмасдан қўшимча мақлар бажаришяпти. Бу эса «Бунёдкор»нинг мавсумолди тайёргарлиги аъло даражада олиб борилаётганлигидан далолатдир.
