Футбол ТВ шарҳловчиси Даврон Файзиев Евро-2020 чорак финал учрашувлари учун ўз тахминини билдириб ўтди.
Бугунга тахминларим
Чехия - Дания. Чехлар яхши ҳимояланишади. Голландияга ҳужум қилишга беришмади. Ўз ҳужуми ҳам кучсиз эмас. Патрик Шик бор. Меҳнаткаш жамоа, темпни ушлай олади, курашувчан. Шунинг эвазига индивидуаллик ва техника етишмовчилиги йўққа чиқарилади. Дания бутунлай фарқ қилади. Ёрқин, ҳужумкор, мобил футбол. Юқори прессинг. Тўпсиз актив ҳаракат. Ёқимли услуб. Отни қамчилаб финалга учиб кетаётган Дания бугун эгардан тушиб, ерда лойга ботиб жанг қилишга мажбур бўлади. Ана шу шароитга Дания тайёрми? Шахсан менинг фикримча айнан Дания ярим финалга мосроқ ва бугун фаворит.
Украина - Англия. Бу жуфтликка чуқурлашмаса ҳам бўлади. Яққол фаворит бор. Англия. Украина эса ҳар босқичда тирмашиб, катта қийинчилик билан чорак финалга етиб келди. Юлдузли ва ҳисоб-китобли инглизларга Шевченко нима таклиф қила олади? Яна ёлғиз Зинченко? Бу сафар қийин. Нимчоракда анча кучсизланишди. Менимча Англия Украинани уйига чиройли кузатиб қўйса керак. Адашсам ҳам жуда ҳафа бўлмайман. Ёқимли томоша.
Даврон Файзиев
