"Манчестер Юнайтед" ярим ҳимоячиси Хуан Мата ёзда бошқа клубга ўтиши мумкин бўлганлигини айтди. Эслатиб ўтамиз, бир ҳафта олдин испаниялик "қизил иблислар" билан шартномасини кейинги мавсум охиригача узайтирганди.
"Албатта, менга бошқа клублардан қўнғироқлар бўлган. Бундай пайтларда сиз ўзингизнинг фаолиятингиздаги янги босқич ҳақида ўйлай бошлайсиз. Аммо менимча, ҳали кетиш вақти келмаган. Мен шу жамоада ўйнай олишимга ишонаман. ", - деди футболчи клуб матбуот хизматига
Мата 2014 йил январидан буён "Манчестер Юнайтед" таркибида ўйнаб, 273 учрашув ўтказди, 51 гол урди ва 47 голга узатма берди. Олдинроқ ярим ҳимоячи "Валенсия", "Лацио" ёки "Рома"га ўтиши мумкинлиги ҳақида хабар берилган эди.