Англия терма жамоасининг қитъа чемпионатида кўрсатган ўйинлари ёрқинлиги билан эсда қоляпти. Бу учун Соутгейт катта ишларни амалга оширгани аниқ. Бунда термага футболчилар танлашда ёндошилган тўғри муносабат ҳам муҳим роль ўйнаган. Боз устига,Евро 2020нинг ярим финал ва финал баҳслари Лондонда ўтаётгани ҳам инглизларга фойдали бўлмоқда. Эндиликда улар ўз мухлислари қаршисида финал учун жанг қилишлари керак бўлади.
Буюк Британия Бош вазири Борис Жонсон сўзларига кўра, Англия финалда ғалабага эришса, август ойида мамлакат бўйлаб жуда катта байрам паради ўтказилиши мумкин. Бу ҳақда нуфузли инглиз матбуоти бўлмиш, «тҳе Сун» расмийлари хабар беришди. Унга кўра, бутун халқ вирус чекловларидан ҳоли бўлган миллий байрамга қизғин тайёргарлик кўрмоқда. Дания билан бўлган ярим финал баҳсини минглаб мухлислар билан бирга Борис Жонсон ҳам стадиондан томоша қилгани айтилган. Англия эса 55 йил ичида илк бор финалда ўйнайди.
Борис Жонсон ушбу ҳодисани мамлакатнинг 19 июль кунги «Озодлик Куни» билан бирга нишонлашни хоҳламоқда. Бу бўйича ўтказилган сўровнома мутлақ кўпчилик томонидан қўллаб-қувватланган. Душанба куни ўтказилажак байрам ҳақида 300 мингдан ортиқ футбол мухлислари томонидан петиция ҳам имзоланган. Лорд Риши Сунак Англия ютишини таҳмин қилган бўлса ҳам, Дания устидан қозонилган ғалабадан кейин айрим инглиз футбол мухлислари ҳалитдан байрамни бошлаб юборган. Ушбу тадбир билан боғлиқ қўшимча маълумотлар сир тутилган бўлса ҳам Лондонда катта байрамга тайёргарлик кўрилётгани аниқ кўриниб турибди.
Бош вазир ўз нутқида: «Ўйлашимча, ғалаба футбол бўйича савиямизни дунё бўйлаб яна бир поғона тепага олиб чиқади», – деди. Шунингдек, ушбу байрам тадбирини август ойига қолдириш варианти ҳам мавжуд. Негаки, Англияда кейинги ойдан ижтимоий масофа ҳамда гуруҳ бўлиб тўпланиб юриш билан боғлиқ чекловлар бутунлай ечилади. Бу бўйича расмий дам олиш кунларидан ташқари, қўшимча дам олиш куни бутун мамлакат бўйлаб эълон қилиниши кўзда тутилган. Италияга қарши 8 миллион футбол ишқибозларидан иборат «армия» шакллантирилаётгани айтилмоқда. Улар барча оммавий майдонларда йиғилиши керак бўлади. Ҳозирда Английда 32 миллиондан ортиқ ишчилар мавжуд. Улар учун 19 июль, душанба дам олиш куни эълон қилинади. Бу эса Якшанба кунги драматик финал тунидан кейин айни муддао бўлади. Худди мана шу нарсага шаъма қилган Жонсон финалдаги ғалабадан қаттиқ умидланаётганини билдириб ўтди.
Хуллас, туманли албион томонда мана шунақа гаплар. Футбол ватани ғалабага катта умид боғлаган. Умуман Италия ва Англия — бу шунчаки классик қарама-қаршилик. Икки хил услуб, икки фалсафа, икки ўчоқ ва икки томон! Ҳар қайси юрт ўз вақтида футбол чўққисини забт этган. Сўнгги бир неча йилда ўзида юлдузларни акс эттираётган инглизларга қарши қайта «уйғонаётган» итальянлар. Ўйин қизиқ ва муросасизликда ўтишига шубҳа йўқ. Беш йилдан кейин яна бир янги чемпионни кашф этишга тайёр туринг!
Жалолиддин Исматов тайёрлади
