«Ювентус» ҳуқуқшунослари яқин вақт ичида Италия футбол федерацияси устидан 444 миллион евролик даъво билан судга мурожаат қилишни режалаштиришмоқда. Бу ҳақда Италия оммавий ахборот воситалари хабар бермоқда.
Туринликлар келишилган учрашувлар билан боғлиқ можаро — «Моджигейт» бўйича суриштирув-тергов ишларидан кўрилган зарарни худди шунча миқдорда баҳолашмоқда.
561 саҳифадан иборат тергов билан боғлиқ ҳисобот эълон қилинганидан сўнг «Ювентус» вакиллари клуб собиқ президенти Лучано Моджининг қилмишларига клубнинг ўзини аралаштирмаслик керак эди, деган фикрга келишган.
Эслатиб ўтамиз, 2006 йили юз берган можаро натижасида туринликлар «В» Серияга бадарға қилинган, шунингдек, сўнгги икки чемпионлик унвони олиб қўйилган эди.
