Миллий терма жамоамизнинг амалдаги бош мураббийи Вадим Абрамов БААга қарши кечган ўртоқлик ўйинидан кейин терма жамоа тарихида энг кўп ўйин ўтказган мураббийлар рўйҳатида Равшан Ҳайдаровни қувиб етди. Жанубий Кореяга қарши ўртоқлик ўйинидан кейин Вадим Карленович иккинчи ўринни ўзиники қилса, Япониядаги ўйиндан кейин биринчи ўринга кўтарилиб олади. Гап шундаки, ҳозирча Рауф Инилеев 27 ўйин билан терма жамоамизни бошқарган мураббийлар орасида рекордчи бўлиб турибди. Равшан Акмалович ҳамда Вадим Карленовичларнинг ҳисобида 25 тадан ўйин бор. Тўртинчи ўринда эса Владимир Сальков — 21 та ўйин.

Терма жамоаларимизда муваффақиятли фаолият олиб бораётган Абрамовнинг асосий термада ажойиб статистикаси бор. Аниқроғи, бири яхши, бири ёмон. Ёмонидан бошлаймиз. Терма жамоа Абрамов қўл остида ФИФА таснифига кирувчи 25 ўйиннинг 13 тасида биринчи бўлиб тўп ўтказиб юборди ва ўша ўйинларнинг бирортасида ҳам ғалаба қозонгани йўқ. 10 та ўйинда мағлубият ва атиги 3 та ўйинда дуранг қайд этди. Иродасизликми бу?

Энди яхшисига ўтамиз. Ўша 25 ўйиннинг 12 тасида Абрамов шогирдлари ўйинда ҳисобни очдилар ва уларнинг бирортасида ҳам мағлубиятга учрамадилар — 10 та ғалаба, 2 та дуранг. Характерми бу?

Хуллас, яна 3 та баҳсдан сўнг, Вадим Абрамов терма жамоа мураббийлари рўйхатида биринчи ўринга кўтарилиб олади. Осиё грандларига қарши кечадиган 2 та ўйин ва ЖЧ-2014 саралишининг финал босқичидаги 8 та ўйинни ҳам қўшиб ҳисобласак, Абрамов мутлақ рекорд ўрнатади, ва айтиш мумкинки, яқин орада бу рекордни ҳеч ким янгилай олмаса керак.