"Челси" хўжайини Роман Абрамович "Барселона"нинг собиқ ҳужумчиси Лионель Месси билан учрашди. Бу ҳақида Diario AS нашри хабар бермоқда.
Манба берган хабарга кўра, россиялик тадбиркор аргентиналик футболчини Лондон клубида кўришни истайди. Аввалроқ, "Челси" "Интер" ҳужумчиси Ромелу Лукакуни сотиб олиши мумкинлиги ҳақида хабар берилганди. Месси билан музокаралар бу келишувга қандай таъсир қилиши ҳозирча номаълум.
"Манчестер Сити" бош мураббийи Хосеп Гвардиола аввалроқ клуб Мессига мос келмаслигини айтганди. ОАВ маълумотларига кўра, футболчига "ПСЖ" қизиқмоқда.
Аввалроқ, "Барселона" аргентиналик билан ёзда тугайдиган шартнома узайтирилмаслигини маълум қилганди. 34 ёшли футболчи 2000 йилдан буён "Барселона" шарафини ҳимоя қилади. Жамоа таркибида у 10 марта Испания чемпионлиги, 7 марта Кубок ва 8 марта Испания суперкубогини қўлга киритган ва 4 марта Чемпионлар лигасида ғолиб бўлган.
