Хабарингиз бор, Coca Cola Ўзбекистон кубоги 1/8 финалидан ўрин олган баҳсда “Навбаҳор” Тошкентнинг “Бунёдкор” клубига қарши майдонга тушади.

“Бунёдкор” футбол клуби тарихан қисқа вақт ичида ҳаваскорлик жамоасидан Ўзбекистон чемпиони, мамлакат кубоги соҳиби ва қитъа Чемпионлар Лигаси ярим финалчисигача бўлган йўлни босиб ўтди.

2005 йилда Тошкент вилояти чемпионатида (2-лига) “Қурувчи” номи билан муваффақиятли иштирок этган жамоа, охир-оқибат Ўзбекистон биринчи лигасига чиқди. 2006 йилда “Қурувчи” биринчи ғолиб чиқди ва олий лига йўлланмасига эга бўлди.

2007 йил мавсуми “Қурувчи” учун олий лигада дебют даври бўлишига қарамай, жамоа Ўзбекистон чемпионатлари тарихида биринчи марта кумуш медални қўлга киритиш билан бирга, Ўзбекистон кубоги финалчисига айланди. “Қурувчи” ҳужумчиси Илҳом Мўминжонов эса рақиблар дарвозасига 21 та тўп киритган ҳолда, миллий чемпионатимиз тўпурарига айланди. 2008 йилда жамоа номи “Бунёдкор”га ўзгартирилди.

Умуман олганда, 2007 йилдан буён Суперлига (олий лига)да иштирок этаётган “қалдирғочлар” шу кунгача 5 марта мамлакат чемпионлиги (2008-2011 йиллар, 2013), 3 марта кумуш (2007, 2012, 2016) ва 1 марта бронза (2019) медалларини қўлга киритишган.

“Бунёдкор” 4 карра Ўзбекистон кубоги (2008, 2010, 2012-2013) ва 1 карра суперкубок соҳиби (2014).

Қизиғи, “Бунёдкор” ва “Навбаҳор” жамоалари Ўзбекистон кубоги баҳсларида шу кунгача ҳали тўқнаш келишмаган ҳамда бўлажак учрашув мазкур мусобақанинг илк тўқнашуви сифатида тарихдан жой олади.

Эслатиб ўтамиз, Ўзбекистон кубогининг 1/8 финалидан ўрин олган “Бунёдкор” – “Навбаҳор” ўйини 20 август куни Тошкентдаги “Бунёдкор” стадионида соат 19:00 да старт олади.

“Навбаҳор” ПФК матбуот хизмати.