«Байер»нинг икки футболчиси «Барселона» билан кечган учрашув пайтида Мессининг либосини талашиб, тортишиб қолиши леверкузенликлар бош мураббийи Руди Феллернинг жаҳлини чиқарди. 

Феллер икки футболчининг ўйин пайтида Мессининг формаси кимга тушишини отасининг молидек бўлишишга уринганини шундай изоҳлади: «Жамоанинг 90 фоиз футболчиси бутун диққат-эътиборини ўйинга қаратишди. Лекин бу икки футболчи воқеалар ривожидан илгарилаб кетди».

    Ҳали бу икки футболчи билан эркакча гаплашиб олмаганини таъкидлаган Феллер бу либосни кимошди савдосида пуллаб, хайрия ишларига сарфлашларини маълум қилди. 

Гап шундаки, биринчи тайм тугаши арафасида «Байер» ҳимоячиси чехиялик Михал Кадлец Мессининг ёнига бориб, совчи қиёфасига кирганча либосининг “қўли”ни сўради. Лекин Мануэл Фредрих ундан чаққонлик қилиб, либосни илиб кетди. Кадлец ўйин тугагач, Мессидан бошқа либос сўрашга мажбур бўлганди.