Coca-Cola Суперлиганинг 16-туридан ўрин олган "Металлург" — "Машъал" (1:2) учрашувидан сўнг мезбонлар бош мураббийи Жасур Абдураимов ўз фикрларини билдириб ўтди.

— Бугун жуда яхши ўйнадик. Зўр ўйин кўрсатдик. Аммо ҳимояда иккита хатога йўл қўйдик. Бу дарвозамизга иккита голни олиб келди. Менинг ўйлашимча, болалар ҳаракат қилишяпти. Бироқ омадимиз келмаяпти. Кичик хатоларимиз бизга қимматга тушаяпти. Ҳозир жамоамиз “омадсизлик йўлагига” тушиб қолган. Бу инқироз эмас. Бу менинг назаримда синов. Синовга эса бардош бериш, чидаш керак, ишлаш керак, меҳнат қилиш керак. Мен бу фикримни кўп бора такрорлаяпман, яна айтаман, натижага эришиш учун ўйнаш керак, қийинчиликларга, синовларга чидаш керак ва ишлаш керак. Умид қиламанки, тез орада натижаларимиз ҳам яхши томонга ўзгаради.

— Ўйин давомида “Машъал" футболчилари тўпни қўл билан ўйнаган вазиятларга фикрингиз қандай?
— Буни ўзингиз ҳам айтиб турибсиз. Мен мураббийман, ҳакам эмасман. Ёки ҳакамлар қўмитасида ишламайман. Бу ҳақида нима дейишим мумкин? Менинг ўйлашимча, тўп қўлга теккандан кейин 11 метрлик жарима берилиши керак. Шахсий фикрим, ўша вазиятларда ҳам пенальти белгиланиши керак эди. Ҳакамлар ҳақида гапиришни истамайман.

— Жамоа белгиланмаган пенальтилар бўйича шикоят аризаси ёзадими?
— Албатта ёзилади. Биз буни ўрганиб чиқдик. Ҳакамлар қайдномасига ҳам буни албатта киритамиз.

— Аммо ҳисоб ўзгаришсиз қолаверади?
— Ҳа, шундай. Ҳисоб энди ўзгармайди. Такрор ва такрор айтаяпман, футболни ҳурмат қилиш керак.

— Ихтиёр Тошпўлатовнинг жамоадан кетишига сабаб нима?
— Ихтиёр Тошпўлатов яхши футболчи. Биз трансфер ойнасида қанот ҳимоячилигига Фаррух Ибрагимовни олдик. Ихтиёр Тошпўлатовни эса ижарага берганмиз. Чунки бундай ўйинчи ўйин амалиётига эга бўлиши керак-ку. У айни пайтда "Турон"да ўйнаяпти.