«Барселона» ўтган ёзги трансферлар ойнасида катта йўқотишга учради.
Жамоанинг юраги, сардори, етакчиси Лионель Месси билан шартномани узайтириш ишлари кутилганидек бўлмади ва Ла Лига қоидаларига зид келгани учун аргентиналик афсунгар деярли 20 йиллик фаолиятидан кейин Каталония клубини тарк этишга мажбур бўлди.
Мессининг ўрнини босишнинг иложи бўлмаса ҳам клуб раҳбарияти ҳужум чизиғи учун Мемфис Депай, Серхио Агуэро, Люк де Йонг ва Юсуф Демир каби футболчилар билан тўлдиришга ҳаракат қилди. Бундан ташқари, марказий ҳимояга "Манчестер Сити"дан Эрик Гарсия олиб келинди. Яна бир хушхабар, Ансу Фати 9 ойлик танаффусдан кейин яна сафга қайтди ва унга 10-рақам ишониб топширилди.
Демак, «Барселона» клубининг Чемпионлар Лигаси янги мавсуми учун қайдномаси билан танишамиз.
Дарвозабонлар: Инаки Пена, Нету, Марк-Андре тер Штеген
Дарвоза чизиғида шубҳасиз тер Штеген бўлиши кутилмоқда. Унга жароҳат етмаса ёки бирор бошқа бир сабаб бўлмаса мавсумни германиялик посбон асосий таркибда ўтказади. Нету захира дарвозабони сифатида қайд этилиши мумкин.
Ҳимоячилар: Хорди Алба, Рональд Араухо, Сержиньо Дест, Эрик Гарсия, Клемен Лангле, Оскар Мингеза, Херар Пике, Самуэл Умтити
Ҳимоя чизиғида Хорди Алба ва Сержиньо Дест қанотлар учун масъул бўлишса, марказ Пике ва Лангле ёки жамоанинг янги аъзоси Эрик Гарсияга ишониб топширилиши мумкин. Араухо, Мингеса муқобил қанот ҳимоячилари ҳисобланишади ва Умтити ҳам захира варианти сифатида кўрилса ажаб эмас.
Ярим ҳимоячилар: Серхио Бускетс, Френки де Йонг, Рики Пуч, Серхио Роберто, Педри, Филиппе Коутиньо
Ярим ҳимояда ранг-барангликни кўришимиз мумкин. Тажрибали Бускетс, юқори техникага эга де Йонг, меҳнаткаш ва жамоанинг етакчиси сифатида кўрилаётган Педри, ўзининг аввалги формасига қайтишга интилаётган Коутиньо, Рики Пуч ва Роберто. Ярим ҳимоядаги бўшлиқни Педри ёпиб кетишга ҳарракат қилиб кўради. Коутинёнинг ҳам ўйини чиқса, уни тўхтатиб қолиш осон бўлмайди.
Ҳужумчилар: Серхио Агуэро, Ансу Фати, Мартин Брейтуэйт, Люк де Йонг, Усмон Дембеле, Юсуф Демир, Мемфис Депай.
Ҳужумчилар кўп... Лекин ҳамма гап сифатда, сонда эмас. Ҳурматни сақлаган ҳолда айтиш мумкинки, Брейтуэйт, де Йонг «Барселона» даражасига мос топ ҳужумчилар эмас. Истиқболли кўринаётган Демир ҳақида хулоса қилишга эрта. Фати жароҳатидан эндигина қайтиб, машғулотларга киришган. Энг юқори формада фақат Мемфис Депай бўлиб турибди. Туркияга қарши баҳсда хет-трикка эришган 27 ёшли форвард «Барселона»нинг асосий форвардига айланса керак. Серхио Агуэро ва Усмон Дембеле жароҳатга мойил футболчи бўлиб қолишгани сир эмас.
Бу мавсумда «Барселона»дан жуда ҳам юқори натижалар кутилмаяпти. Бироқ, кўплаб мўъжизалар мана шундай кутилмаган вақтларда содир бўлишини барчамиз яхши биламиз.
