Россия Федерациясининг Қозон шаҳрида биринчи МДҲ ўйинлари ўз якунига етди.

Ушбу мусобақа якунига кўра Ўзбекистон делегацияси 23 та олтин, 32 та кумуш ва 36 та бронза медалини, умумий ҳисобда 91 та медаль қўлга киритди. Бу орқали терма жамоамиз 9 мамлакат ичида иккинчи ўринни эгаллади.

Биринчи ўрин мезбон Россияга насиб этган бўлса, кучли учликка Қозоғистон вакиллари якун ясашди.

Эслатиб ўтамиз, мусобақа давомида боксчи йигитларимиз 9 та (4 та олтин, 3 та кумуш ва 2 та бронза), қизларимиз эса 11 та (3 та олтин, 6 та кумуш ва 2 та бронза) медалларни Ўзбекистон делегацияси ҳисобига қўшиб қўйишди.