Футзал бўйича Ўзбекистон терма жамоаси Жаҳон чемпионатида ўзининг иккинчи учрашувини ўтказди. Бу сафар вакилларимизга дунёнинг энг кучли жамоаларидан бири — Россия терма жамоаси рақиблик қилди.

Баҳодир Аҳмедов шогирдлари биринчи баҳсдан фарқли ўлароқ ҳаяжонни тезда енгиб олиб, юқори концентрация асосида ҳаракатлана бошлашди. Бу сафар дарвозадан ўрин олган Равшан Элибоев ўйинни жуда яхши ўтказиб, 15дан ортиқ сэйв намойиш этди.

Руслар баҳснинг 10-дақиқасида бразилиялик Робиньонинг индивидуал маҳорати эвазига ҳисобни очишди. Орадан бир дақиқа ўтиб бурчак зарбасидан сўнг Артём Ниязов тўпни дарвозага жойлаб, ҳисобдаги фарқни оширди.

Шундан сўнг ҳисоб йирик кўриниш оладигандек таассурот уйғона бошлади. Аммо Ўзбекистон танаффусгача ушбу ҳисобни ушлаб қолди ва иккинчи бўлимни янада юқори савияда ўтказди. Тайм бошида Дилшод Раҳматов кучли зарба билан Россия дарвозасини ишғол қилди. Шундан сўнг ташаббус ҳамюртларимиз томонига ўтди. 28-дақиқада ўзбекистонликлар бурчак зарбасини голга айлантириб, ҳисобни тенглаштиришди — 2:2.

Шундан сўнг россияликлар яна темпни оширишди. Баҳс тугашига 5 дақиқа қолганида улар ижросидаги бурчак зарбаси гол билан якунланди. Вакилларимиз ҳали ўзига келиб улгурмасдан Артём Ниязов яна бир гол урди ва хет-трикка эришди. Якуний ҳисоб — 2:4.

18 сентябрь куни бўладиган Мисрга қарши ўйинда Ўзбекистонга ғалаба керак. Шунда жамоамиз нимчорак финал йўлланмасини қўлга киритади.

Футзал бўйича ЖЧ. "B" гуруҳи, 2-тур
ЎЗБЕКИСТОН - РФИ - 2:4 (0:2)
Голлар: Даврон Чориев (21), Машраб Одилов (28) — Робиньо (10), Ниязов (11, 35, 35)