19-24 март кунлари футзал бўйича клублар ўртасидаги Осиё чемпионати саралаш баҳслари бўлиб ўтади. Ғарбий минтақа ўйинларига Тошкент мезбонлик қилса, Шарқий минтақа жамоалари финал босқичи йўлланмаси учун Вьетнамнинг Хошимин шаҳрида курашга киришишади.

Вьетнамдаги саралаш баҳсларида олти жамоа, икки гуруҳга бўлинган ҳолда баҳс олиб боради. Футзал бўйича Хитой чемпиони, Австралиянинг «Маккаби Хакоа», Вьетнамнинг «Тай Сон Нам» клублари «А» гуруҳини ташкил этишса, «В» гуруҳидан Индонезиянинг «Пелиндо» ҳамда Таиланд ва Мьянма чемпионлари бор.

Гуруҳда дастлабки икки ўринни эгаллаган жамоалар ярим финал ўйинларида майдонга тушишади. Ярим финал ғолиблари 2012 йилнинг июль ойида Кувайтда бўладиган финал босқичига йўл олишади.

ОФК Вьетнамдаги саралаш ўйинларини бошқариб борадиган расмийлар рўйхатини эълон қилди. Улар орасида ўзбекистонлик Шуҳрат Пўлатов ҳам бор. Марказий Осиё минтақасидан, шунингдек, қирғизистонлик Нурдин Букуев ҳамда туркманистонлик Вадим Баратов ҳам Вьетнамда бўлишади.

Умуман олганда, Шарқий минтақа саралаш мусобақаларига 8 нафар ҳакам, икки нафар комиссар ва икки нафар ҳакамлар инструкторлари жалб этилган.

ОФК аввалроқ Ғарбий минтақадаги саралаш баҳсларини бошқариб борадиган ҳакамлар рўйхатини эълон қилганди. Эътиборли томони, Тошкентдаги ўйинларни фақат шарқий осиёлик ҳакамлар бошқариб борса, Вьетнамдаги ўйинларга Ғарбий минтақа реферилари таклиф этилган.

Футзал бўйича клублар ўртасидаги Осиё чемпионати саралашида (Вьетнам) хизмат қиладиган расмийлар рўйхати
Комиссарлар: Сунил Синавира (Шри Ланка), Каня Кеомани (Лаос).
Ҳакамлар инструкторлари: Вонг По Он Анди (Гонгконг), Адриан Тамплин (Австралия).
Ҳакамлар: Маҳмудризо Носирлу (Эрон), Алиризо Суҳробий (Эрон), Нурдин Букуев (Қирғизистон), Вадим Баратов (Туркманистон), Шуҳрат Пўлатов (Ўзбекистон), Абдулла Абдулраҳмон Абдулқодир (Баҳрайн), Ҳусайн Халайла (Иордания), Муҳаммад ал-Ҳаддад (Кувайт).