Ўзбекистон вице-чемпиони «Насаф», уч кунлик танаффусдан сўнг, машғулотларни бошлади. Машғулотлар Қарши шаҳридаги «Марказий» стадиони машғулотлар майдонида олиб борилмоқда.

Клуб расмий сайти маълумотига кўра, жамоанинг 22 февралдаги машғулотларида Артур Геворкян ва Андрей Переплёткиндан бошқа барча маҳаллий ва легионер футболчилар иштирок этишди. Туркманистонлик яримҳимоячи жамоа сафига бугун, 23 февраль куни келиб қўшилган. Латвия терма жамоасидан чақирув олган Андрей Переплёткин эса 1 мартдан кейин «Насаф»га қайтади. Бу вақт оралиғида у Латвия терма жамоасининг Туркиядаги йиғинларида қатнашиб, Қозоғистон терма жамоасига қарши ўртоқлик учрашувида майдонга тушиши ҳам кутилмоқда.

«Насаф» дарвозабонларидан бири Элдор Суюнов олимпия терма жамоасига жалб этилгани, қаршиликлар билан шу йил шартнома имзолаган дарвозабон Ғайрат Ҳасанов кичик жароҳати борлиги сабаб, клуб раҳбарияти ЎФФ билан келишган ҳолда миллий терма жамоа йиғинига жалб этилган Мурод Зуҳуровни жамоада қолдиришга қарор қилди. Қайд этиш жоиз, «Насаф» футболчиларидан Фозил Мусаев ҳамда Кенжа Тўраев ҳам олимпия терма жамоаси таркибида шуғулланмоқда.

«Насаф» тайёргарликни Қарши шаҳрида давом эттиради. Жамоа шу ҳафтада ўртоқлик учрашувида майдонга тушишни режалаштирган.

Эслатиб ўтамиз, «Насаф» мавсумдаги дастлабки расмий учрашувни 6 март, сешанба куни БААнинг «Ал-Жазийра» жамоасига қарши ўтказади. Ўйин Қарши шаҳрида ўтказилади.