12 октябрь куни аёллар Олий лигасида 18-тур учрашувлари бўлиб ўтади ва шу билан мусобақанинг I босқичи ўз якунига етади.

Мазкур босқичда 10 та жамоа уй-сафар тизимида ўзаро икки мартадан тўқнаш келди. Регламентга кўра, II босқичда жамоалар турнир жадвалидаги ўрнидан келиб чиқиб, тенг иккига бўлинади. Бунда 1-5 ўрин эгалари чемпионлик учун ва 6-10 ўрин эгалари лигадан тушиб кетадиган 1 та жамоа номини аниқлаш учун ўзаро яна бир мартадан майдонга тушади. Шунда умумий 23 тур ўтади ва барча жамоа 22 тадан учрашувда иштирок этади.

II босқичга 13 октябрь куни соат 12:00 да қуръа ташланади ва у онлайн эфирга олиб чиқилади. Қуръа давомида жамоалар вакиллари бевосита иштирок этиши мумкин. Қуръада бергер тизими ишлайди. Яъни, олдиндаги учрашувларнинг қай бири сафарда ва қай бири уйда бўлиши масаласини қуръа аниқлаб беради.