Хабарингиз бор, "Ньюкасл" эндиликда дунёнинг энг бой клубига айланмоқда. Жамоа бундай ажойиб шароитдан фойдаланиб, бир-нечта катта трансферларни амалга ошириши кутилмоқда. Балки, клуб таркиби бутунлай янгиланиб кетар, буниси ҳозирча қоронғу. Лекин шуниси аниқки, “оқ-қоралар” бир нечта дунё даражасидаги юлдузлар учун “совчи”лар юборишса керак. Stadion.uz юлдуз футболчиларнинг “янги бойлар” таркибида пайдо бўлиши эҳтимоли хақида сўз олиб боради.
Жанлуиджи Доннарумма ("ПСЖ")
Италиялик дарвозабоннинг “Ньюкасл” сафига ўтиш эҳтимоли бор дейишга икки сабаб мавжуд. Биринчиси — Жижи янги жамоасида етарли ўйин амалиётига эга бўлмаётганлигидир. Доннарумма парижликлар сафига асосий дарвозабон бўлишни хоҳлаб борганди. Ҳозирча ҳаммаси Доннарумма истаганидек бўлмаяпти. Унинг устига Почеттино жамоасининг ички муҳити яхши эмасдек кўринмоқда. Албатта, баъзида юлдузларнинг фикри раҳбарият учун мураббийникиданда устунроқ бўлаётгани кўзга ташланмоқда. Балки, ҳаммаси ўз ўрнига тушар. Аммо Жанлуиджининг “Ньюкасл” клубига ўтиши мумкинлигига иккинчи сабаб, биринчи сабабнинг қай даражада ривожланишига қараб ўтирмайди. Яъни ҳамма гап италияликнинг агентига боғлиқ бўлиб қолиши мумкин. “Бузоқчалар ўлкаси”да туғилган йигитчанинг агенти эса ўша машҳур Мино Райола. У Доннини Англияга кўчиб ўтишига кўндириши мумкин. Чунки бу трансфер ҳар томонга ҳам маъқул келади. Италиялик дарвозабонга асосий таркиб, “янги бойлар”га ишончли посбон, Райолага миллионлаб пуллар тегади.
Килиан Мбаппе ("ПСЖ")
Франциялик юлдуз Париждан кетиши тобора ойдинлашиб бормоқда. Балки “Жеймс парк” эгалари бу вазиятдан фойдаланиб қолар. Ҳар ҳолда бу трансфер уларга текин тушади. Фақатгина, Мбаппени молиявий томондан рози қила олишса бас. Лекин Килиан “Реал Мадрид” таркибига бориб қўшилиш ҳақида ўйламоқда. Аммо инглиз клуби Мбаппени ўз лойиҳаларига ишонтира олса, ҳаракат қилиб кўрса бўлади. Бир тарафдан қараганда Мбаппе “Ньюкасл” таркибида пайдо бўлиши мумкиндек кўринмоқда. Иккинчи томондан қараганда Мбаппе ва катта маош тескари парадоксга ўхшамоқда. Мбаппе орзуларини пулга алмашмаса керак. Килианнинг “янги бойлар” таркибида пайдо бўлиш эҳтимоли жуда кам. Лекин янги жамоага Зидан мураббий бўлса, бу фикр ўзгариши мумкин.
Эрлинг Холанд (“Боруссия Дортмунд”)
Холанд ҳозирги кунда ҳар бир гранд жамоа қўлга киритишни истайдиган икки футболчидан биттаси. Норвегиялик шунчаки даҳшатли голеадор эканлигини исботлаб бўлди. Унинг Бундеслигадан кетиш вақти келгандек кўринмоқда. Қизиқ, ҳозирча Эрлинг қайсидир жамоада ўйнаш истагидалиги мавҳумлигича қолмоқда. “Кичкинтой қотил” учун Премьер-лига энг тўғри қарордек кўринмоқда. Агар “оқ-қоралар”нинг янги лойиҳасида тезда жамоани кучайтириш ва кубок ютиш режаси бўлса, унда Эрлинг энг яхши вариант ҳисобланади. Ҳа айтганча, Холанднинг ҳам агенти ўша Райола.
Неймар ("ПСЖ")
Ҳар трансфер ойнасидаги шов-шувларда Неймарнинг “Барселона” сафига қайтиши ҳақида фейк хабарлар тарқалади. Ҳар ҳолда шамол бўлмаса дарахтнинг учи қимирламайди деганидек, Неймарга Парижда нимадир ёқмаётгандек кўринмоқда. Бразилиялик ўйинчи саргузаштни ёқтирадиган футболчи. Шу хислати туфайли Францияга кўчган футболчи АПЛда ўзини синаб кўриш қарорига келиш эҳтимоли йўқ эмас. Унинг устига, Неймарнинг ўйини кўпларни ўзига ошиқ қилиши ҳаммага маълум. Балки Қироллик ҳонадонида ҳам унинг мухлислари мавжуддир. Агар ундай бўладиган бўлса, Неймарни ўзларининг жамоасига олиб келиш учун тиришиб кўриши аниқ. Қисқа қилиб айтганда, Неймарнинг характери ва жаҳонгашталиги бу трансфер бўлиш эҳтимолини кўрсатмоқда. Агар “Ньюкасл” ростмана бу трансфер учун ҳаракат қилса.
Пауло Дибала (“Ювентус”)
Аргентиналик юлдузнинг туринликлар билан шартномаси тугаш арафасида турибди. Футболчининг иқтидорига шубҳа қилиш хато. У жуда ҳам иқтидорли. Аммо “Ювентус” унинг жойи эмасдек кўринмоқда. Дибала ўзини яна кўрсатиши учун имкон пайдо бўлиши мумкин. АПЛда Дибала балки очилиб кетар. Катта трансферларга ҳали қўл урмаслиги мумкин бўлган “янги бойлар” арзонроққа кимнидир жамоага олиб келиб, унинг атрофида нисбатан машҳур бўлмаган футболчилар билан ўйин қурмоқчи бўлса, унда уларнинг шорт-листида Дибала бўлиши мумкин. Пауло учун етакчилик керак. У эркин ҳаракат қилса, яхшироқ ўйнай олади. Бу трансфер икки томон учун ҳам манфаатли бўлиши мумкин.
Булар шунчаки дунёнинг энг бой клуби эътиборига тушган юлдузлар бўлиши мумкин. Лекин ҳали жамоанинг келажаги қандай бўлишига қараб кейинчалик асосий трансферлар ҳақида гапиришимиз мумкин. Сизнингча “Ньюкасл” харид қиладиган илк футболчи ким бўлади?
Миржалол Пардабоев тайёрлади.
