Кеча Чемпионлар лигаси баҳсларининг навбатдаги тур уйинлари уз ниҳоясига етди. Унда энг қизиқарли ва драматик кечган учрашувлардан бири – бу «МЮ» ва «Аталанта» қарама-қаршилиги. Кўпларни қўрқитган ва ҳайратга солган учрашув сўнгги жуда ҳам қизғин кечди. Натижа эса мезбонлар, «қизил иблислар» фойдасига ҳал бўлди. Уларнинг кейинги ўйини АПЛ доирасида «Ливерпуль»га қарши кечади. Айнан мана шу мавзуда «МЮ»нинг собиқ футболчиси, афсонавий Пол Скоулз ўз фикрлари билан ўртоқлашди. Қуйида бу ҳақда билиб оласиз.
Манкунянликлар ўз тарихида яна бир ёрқин камбекни қайд этди. Бу «Олд Траффорд»да Италиянинг «Аталанта»сига қарши эришилган ғалаба эди. Дастлабки бўлимда 0-2 ҳисобида ортда қолаётган мезбонлар якунда ғалабани суғириб олишди. Шунингдек, бу ўйин Сульшер қўл-остидаги жамоанинг энг ёмон ўтказган биринчи таймларидан бири бўлди. Иккинчи тайм эса мутлақо ўзгача кечди. Жамоа камбекка эришди. Шунга қарамай, собиқ «қизил иблис», Скоулз келаётган турда «орзулар театри»да кечадиган «Ливерпуль»га қарши ўйинда, жамоага буни яна қайтариш имконияти берилмаслигини таъкидлади. Ҳозирда «BT Sport» телеканали мутахассиси бу ҳақда шундай дейди:
«Биринчи бўлимда мен ўйин тезроқ тугаб, танаффус бўлишини асабийлик билан кута бошлагандим. Тайм хавотир, ишончсизлик ва нобирдамликка тўла эди. Жамоа гўёки ўзида эмасдек ҳаракат қилди. Айниқса, бу нарсалар тўртта ҳимоячи ва иккита таянчдагиларда янада кўпроқ кўзга ташланди. Ҳа, улар кейинчалик иккинчи таймда ўзгаришди. Ҳатто, Магуайр гол урди. Лекин, нима деб ўйлайсиз, бу жамоа «Ливерпул» ёки «Манчестер Сити»га қарши шундай ўйнай оладими? Менимча, улар буни миллион йилда ҳам эплай олишмаса керак. «МЮ»да иккита ярим ҳимоячи ўйин давомида ўзи билганича ҳаракат қилди. Шу сабаб рақибларга кўп имкониятларни бой беришди. Тартибли ва сифатли ҳимояга қарши эса, бу ўйин билан бориб бўлмайди, ютиб бўлмайди. Тасаввур қилинг, жамоа ўз уйида Юрген Клопп армиясига қарши мана шу зайлда чиқса-а?! Нима нима бўлади? Жавобини ўзингиз яхши биласиз. Масалан, Клопп жамоаси Сульшерники каби дарвозабонга кўп ҳам суяниб қолмаган. Уларнинг шаклланган ва ҳужумкор жамоаси бор. Мен ваҳима қилмоқчи эмасман. Аммо «Аталанта»га қарши ўйиннинг биринчи бўлими мен учун ҳақиқий дахшатнинг ўзгинаси эди».
Скоулз сўзида давом этар экан: «Жамоада «Ливерпуль»га қарши 4-2-4 схемасида ўйнаш имкони йўқ. Агар мағлубият истамаса, Сульшер тактик қарашларини ўзгартириши ва рақибга мослашиш керак. Фред ва Мактоминай бўладими ёки бошқасими, буни фарқи йўқ. Исталган ўйинда ярим ҳимоячиларни «Аталанта» билан учрашувдаги каби ҳаракат қилишларига йўл қўймаслик керак. Ҳужумчиларнику, гапирмаса ҳам бўлади. Улар ҳам аслида ҳимоя учун жон куйдиришлари шарт. Агар «МЮ» ««Сити» ёки «Ливерпуль»га қарши ҳам мана шу зайлда ўйнаса, ҳақиқий фожеани томоша қиласиз. Шахсан мен бундай бўлмайди деб умид қиламан», – дейди.
Қозонилган ғалабадан кейин Сульшер ўз шогирдларини биринчи таймда ҳам яхши ўйин кўрсатганини таъкидлади. У бу ҳақда шундай деганди: «Биз биринчи бўлимда етарлича яхши ўйин кўрсатдик. Иккита гол эса, иккита берилган имконият сабаб юз бериди. Улар бунда кутилмаган пайтда биринчи голни, стандарт вазиятдан эса иккинчисини ҳосил қилишди. Шунга қарамай, биз ишончни сўндирмай, ҳаракатда бўлдик».
Ҳа, Скоулзнинг гапида жон бор. Агарда Клоппга қарши нимагадир эришиш керак бўлса, ҳақиқатдан ҳам Сульшер жамоани рақибга мослаштириши лозим. Акс ҳолда, яна «Save Ole» ҳаштеги остида хабарлар тарқалиши, ҳеч гап эмас.
инглиз тилидан Жалолиддин ИСМАТОВ таржимаси
