"Рома" бош мураббийи Жозе Моуриньо Конференциялар лигасида Норвегиянинг "Будё/Глимт" клубидан учралган шов-шувли мағлубият (1:6) учун жавобгарликни ўз зиммасига олди, бироқ Рим жамоасини таркибидан шикоят қилди.

"Мен ушбу таркиб билан ўйнашга қарор қилдим, шунинг учун масъулият менинг бўйнимда. Совуқ ҳавода, суний майдонда жамоада астойдил меҳнат қилаётганларга имконият бериш учун яхши ният қилгандим. Кўплаб футболчиларга дам беришга қарор қилдим. Биз яхшироқ ўйин кўрсатган жамоага ютқаздик. Бу жуда оддий.

Агар доим бир хил таркибда ўйнай олганимизда, шундай қилган бўлардим. Бу хавфли, чунки бизда ўйинчиларнинг ўртасида катта сифат фарқи бор. Мен бу клубнинг имкониятларини билардим, бу мен учун янгилик эмас эди, лекин барибир жамоамдан энг яхши ўйинни кутгандим. Айтганимдек, бу таркиб билан ўйнаш менинг танловим, демак, бу менинг айбим.

Имкониятларимиз чекланганлигини ҳеч қачон яширмаганман. Бизда 13 нафар футболчи бор, қолганлари бошқа даражада. Нега доим бир хил ўйинчилардан фойдаланишимни мендан ҳеч ким сўрамайди. Сабабини эса юқорида айтиб ўтдим. Асосий жамоамиз яхши ўйин кўрсатмоқда, жорий мавсумда улар кўпроқ очко тўплашди ва тўғри менталитетни шакллантиришмоқда", - деди Моуриньо ўйиндан сўнг.